پیکٹ والے نوڈلز بچے کو دے کر اپنی جان نہ چھڑائیں۔۔ بازار کے پیکٹ والے نوڈلز بچوں کو کن بیماریوں میں مبتلا کرسکتے ہیں؟ جانیں

بچے عام طور پر چٹ پٹے ذائقے کے لئے پیکٹ والے نوڈلز ماؤں سے ضد کر کے پکواتے ہیں اور مائیں بھی جلدی اور آسانی سے تیار ہوجانے کی وجہ سے بچوں کی ضد پوری کردیتی ہیں لیکن یہ پیکٹ والے نوڈلز کس حد تک خطرناک ہیں یہ ہم آپ کو اس آرٹیکل میں بتائیں گے تاکہ آپ بھی بچوں کو یہ دینے میں احتیاط کریں۔

ہائی گلیسیمک انڈیکس

نوڈلز میں ہائی گلیسیمک انڈیکس ہوتا ہے، جس کا مطلب ہے کہ وہ بلڈ شوگر کی سطح میں تیزی سے اضافہ کر سکتے ہیں۔ یہ ان لوگوں کے لیے تشویش کا باعث ہے جو ذیابیطس کے شکار ہیں یا ان لوگوں کے لیے جو اپنے خون میں شکر کی سطح کو منظم کرنا چاہتے ہیں۔ بچوں کو چھوٹی عمر میں ہی نوڈلز کھلانا غیر ضروری موٹاپے کی جانب دھکیل سکتا ہے۔

غذائیت نہ ہونے کے برابر

یہ عام طور پر اچھی غذائیت کے حامل اجزاء سے تیار نہیں کیے جاتے جس کی وجہ سے یہ جسمانی ضروریات کو پورا بھی نہیں کرتے۔ بچے اور ماں کو لگے گا کہ کھانا تو کھا لیا لیکن اس سے صرف پیٹ بھرے گا اور جسم کو غذائیت ملنے کے بجائے الٹا نقصان ہوگا۔

ہاضمہ کی تکلیف

بچے نوڈلز کھانے کے بعد پیٹ درد، ہاضمے میں تکلیف، اپھارہ اور گیس کی شکایت بھی کرتے ہیں کیونکہ یہ پراسیسڈ اور غیر معیاری اجزء سے تیار کیا جاتا ہے اور ہضم ہونے میں بھی کافی وقت لگاتا ہے۔